Erkən xəbərdarlıq sistemlərinə AI inteqrasiyası: fermerlər üçün nə deməkdir?

BCAW2026 çərçivəsində “Çoxmühitli erkən xəbərdarlıq sistemlərinə AI inteqrasiyasının üstünlükləri və çətinlikləri” mövzusunda panel sessiya keçirilib.

Kənd təsərrüfatı nazirinin müavini İlhamə Qədimova fermerlər üçün iqlim təhlükəsinin heç vaxt sadəcə meteoroloji hadisə olmadığını bildirib: quraqlıq məhsul itkisinə, isti hava dalğaları bitkilərin məhsuldarlığının azalmasına və heyvandarlıqda istilik stresinə, güclü yağıntılar isə əkin sahələrinə və kənd infrastrukturuna zərər vurur.

Nazir müavininin vurğuladığı əsas məqam: kənd təsərrüfatında vaxt həlledicidir — təhlükə barədə hətta 24 saat əvvəl verilən xəbərdarlıq potensial zərərin əhəmiyyətli dərəcədə azaldılmasına imkan verir. Amma yalnız proqnoz kifayət deyil: proqnoz fermer üçün vaxtında, anlaşılan və konkret fəaliyyətə imkan verən qərara çevrilməlidir. Kənd Təsərrüfatı Nazirliyinin süni intellekt proqramı bitki sağlamlığının monitorinqi, xəstəlik və zərərverici risklərinin qiymətləndirilməsi, məhsuldarlığın və suya tələbatın proqnozlaşdırılması və suvarmanın idarə olunmasını əhatə edir.

Sessiyada həmçinin Azərbaycanın COP29 çərçivəsində təqdim etdiyi Fermerlər üçün Bakı Harmoniya İqlim Təşəbbüsü xatırladılıb — təşəbbüsün məqsədi iqlim maliyyəsi, bilik və texnologiyanın kiçik fermerlər, kənd qadınları və gənclər üçün əlçatanlığının artırılmasıdır.

Mənbə: Azərbaycan Respublikasının Kənd Təsərrüfatı Nazirliyi — agro.gov.az